Av jord ...
Av jord er du komen
Or jord livnar alt
Den var, er og kjem
Ein ring utan byrjing
Ein ring utan ende
I den mjuke jord
ein skog slær rot
Ei kjempe flott
blir hus, ei anna slott
Den siste smuldrar bort
Svart ligg ho der
Somme stader raud
Ikkje vakker, heller stygg
Men utan den
ligg verda daud.
Alle vaks dei fram
Alle fall dei ned
I jordas mørke djup
Vil vi alle finne fred
I den svarte mold
ei spire grøn kjem fram
Eit lite frø veks til
eit aks med tjuge fold
Mot svolt, naud og skam
blir brød eit varleg skjold
Sol, vatn, jord
Eit lite frø,
og det nye livet gror
Det som døydde
vart det nye livets mor
Jorda si mogne grøde
blir borna si rike føde
Av jord får dei sitt
Både store og små
Og dyr som spring fritt
So har kan hende
alt ei meining
som kan sorg
til lukke vende
Som ei hand med ring
Når den kjærleg
stryk deg over kinn
Tekst: Terje Marøy
Lesning: Lise Granden Berg
Komposisjon, cello og effekter: Jan Ragnar Storheim